Гісторыя стварэння музея

     Музей “Зямля гудагайская: матэрыяльнае і духоўнае” Гудагайскай сярэдняй школы адкрыўся  26 мая 2004 года. На працягу пяці гадоў настаўнікамі-энтузіястамі вялася падрыхтоўчая работа па збору матэрыялаў.

   Вялікую колькасць экспанатаў перадаў музею доктар філалагічных навук, прафесар, краязнаўца і патрыёт Адам Іосіфавіч Мальдзіс – былы вучань Гудагайскай сямігадовай школы. Прафесару А.І. Мальдзісу належыць ідэя стварэння музея рэгіёна, адсюль тэматычная яго абмежаванасць.

     Так выглядалі першапачаткова некаторыя раздзелы экспазіцыі

     У 2015 годзе значна папоўненная, аформленная сугучна патрабаванням новага часу, экспазіцыя музея перамясцілася ў новае памяшканне.

                                               Так выглядаюць сучасныя раздзелы экспазіцыі музея

    Асаблівасць яго ў тым, што гэта – музей рэгіёна, хоць некаторыя экспанаты выйшлі за геаграфічныя рамкі Гудагайскага сельскага савета. Адкрыты ўпершыню 26 мая 2002 года, дзякуючы намаганням тагачаснага дырэктара школы Клімянка Ігара Рыгоравіча, сёння ён перажывае сваё другое нараджэнне. Прасторнае прыгожае памяшканне, знешняе афармленне, адпавядаючае патрабаванням новага  часу,  набыў ён, дзякуючы ініцыятыве і намаганням сёняшняга дырэктара школы Капцюг Ганны Мечыславаўны, яе намесніка па гаспадарчай рабоце Вайшко Наталлі Пятроўны, мужчынскай групы тэхнічных работнікаў, а таксама дзесяткаў настаўнікаў, вучняў і іншых працаўнікоў  школы.

     Нягледзячы на тое, што экспазіцыя па-ранейшаму складаецца з 5 асноўных  раздзелаў, змест іх значна пашырыўся. Кожны год музей папаўняўся новымі экспанатамі, і сёння  фонды музея складаюць каля 2 000 адзінак.

 З часу  адкрыцця музея і да снежня 2018 года  работу музея  ўзначальвала  Марыя Карлаўна Васілёнак. Зараз кіраўніком музея з’яўляецца настаўніца беларускай мовы і літаратуры Ірына Мікалаеўна Жалток.

   З 02.12.2016 года ўсім тым, хто зацікаўлены гісторыяй і культурай зямлі гудагайскай, стаў даступны аднайменны сайт нашага школьнага музея «Зямля гудагайская: матэрыяльнае і духоўнае».

  Створаны намаганнямі кіраўніка музея Марыі Карлаўны Васілёнак, пры ўдзеле інжынера-праграміста школы Юрыя Іванавіча Шыхаўцова і ўсіх неабыякавых педагогаў і навучэнцаў нашай установы, сайт стаў Інтэрнэт-рэсурсам, наведваемым гасцямі з самых розных куткоў нашай Зямлі.

  30 верасня 2019 года Міністэрствам культуры Рэспублікі Беларусь музею прысуджаны статус “Народны гісторыка-краязнаўчы музей «Зямля гудагайская: матэрыяльнае і духоўнае”.

   Штомесяц з экспазіцыямі музея знаёмяцца каля тысячы віртуальных наведвальнікаў з Расіі, ЗША, Францыі, Нідэрландаў, Германіі, Швецыі, Канады, многіх іншых краін і, вядома ж, нашай Беларусі.

     У бліжэйшых планах творчай групы распрацоўшчыкаў кантэнту сайта – пашырэнне экспазіцый музея і стварэнне магчымасці прагляду многіх з іх у рэжыме віртуальнай рэальнасці.